אדיקטיוו פונקט ווי דראגס

כ'האב געהערט וועגען א סטאדי וואס איז געקומען צי די מסקנא אז פירען און קאנטרעלירען מענטשען אינטער זיך מיט א שטארקע פאווער איז אדיקטיוו פונקט ווי דראגס, קאקעין,

וואס דאס מיינט איז, אז איינער וואס האט א מאכט וועט טוהן אלעס אין די וועלט עס אהן צי האלטען אין ער וועט נישט קענען זעהן אדער פארשטיין עפעס וואס איז א סתירה דערצי,

יעצט בנוגע סקווער איז אזוי, סקווירא רבי זיצט שוין 44 יאר על כסא מלכותו, ער האלט זיך ממש ווי א קעניג, ס'איז כמעט נישטא א חסידות אין די וועלט וואס זיי זענען אזוי אינטערטעניגט צי זייער רבי אזוי ווי סקווער, ס'ממש אז זיי ציטערען פין אים, אויך זענען זיי משוגע פארגלייבט אין אים  אסאך טיפער אין מער ווי אסאך אנדערע פלעצער,

 מען דארף נאר חאפען א בליק ווען זיינע חסידים גייען דורעך ביי לחיים אדער ביי גוט שבת זאגען ס'קוקט אויס ממש שרעקעדיג, ווען ס'האט זיך מיר געמאכט צי וויילען דארט פאר א שבת, אין כ'האב געזעהן די לחיים צערעמאניע, איז עס ממש געווען אומגלויבליך, וויזוי קען מען נעמען געהעריגע מענטשע אין זיי פארוואנדלען אין אזאלכע דערשראקענע באשעפענישען, אין דאס ווייזט אויף א טיפע מוח שווענקונג, אין וויזוי די גאנצע מיינדסעט גייט דארט צי,

אבער לאמיר גיין צישטייטעלעך, אזוי ווי ס'איז באקאנט איז סקווערע רבי געווארען רבי ביי די 28 יאר, אין אזוי ווי ס'איז באקאנט איז ער אלץ קינד/בחור/יונגערמאן נישט געווען עפעס ספעציעל, אין פליצלינג אלץ יונגערמאן פין 28 איז זיין טאטע אוועק, אין ער איז פין איין טאג אויפען צווייטען געווארען רבי,

יעצט ווען אזא איינער ווערט רבי איז דא א גרויסע פראבלעם, ווייל דער עולם האט נישט צי שטארק געהאלטען פין עים אין די הייסע האבען געוואלט אז ס'זאל ווייטער גיין איז עס געווען א פראבלעם,

אויך האבען געוואוינט אין סקווער א שיינע פאר פרעמדע יונגעלייט וואס זענען דארט געווען איידעמער אין זיי זענען אוודאי נישט געווען הייס פאר דעם יונגען רבי'ן, אין דא איז די מצב געווארען הייס, ר' ישעי' אונגער דער גבאי, האט אנגעהויבען ווערען ווילד, טאמער ס'געקומען א רב אדער א רבי וואס האט נישט געהאט גענוג דרך ארץ האט יענער געחאפט,  עכ"פ מען האט אנגעהויבען צי בויען די חסידות,

נאכדעם איז געקומען עטנישע ריינוגונג, די פרעמדע יונגעלייט זענען ארויסגעווארפען געווארען פין שטעטעל, קומען צים טיש איז געווארען א דאורייתא, אין אזוי ווייטער,

ציביסלעך איז אויסגעוואקסען א גאנצע קאמאניסטישע סיסטעם, ווער ס'האט מער גערעהט פין די גרויסקייט פין רבי'ן דער איז געוואקסען אויפען לייטער, טאמער איינער האט געקרימט מיט די נאז האט מען שוין געוויסט אז ער איז פין די יעניגע, די מלמדים אין חדר האבען מחנך געווען מיט די רבי אין די רבי אין די רבי, אין אזוי ווייטער, ביז ציביסלעך האבען זיי פארגעסען אז ס'דא א באשעפער אין געטראכט א גאנצע טאג פין די רבי אין די רבי אין די רבי,

יעצט ווען א רבי ווערט רבי אין זעצט זיך אויבען אן ביים טיש, אין די חסידים שטעלען זיך ארום אין קוקען אים אריין אין דעם פרצוף אריין, טראכט דער רבי אז מסתם זענען זיי משוגא געווארען, כ'מיין... וואס ווילען זיי פין מיר,

אבער ווען ס'גייט אריבער א שטיק צייט, אין דער רבי געוואוינט זיך צי, הייבט ער אן צי טראכטען אז די וועלט איז דאך נישט משוגא, סאו מסתם בין איך טאקע עפעס, אין מיט די צייט הייבט ער אן צי האלטען אז ער איז נישט נאר "עפעס" נאר אביסעל מער ווי עפעס, אין אזוי גייט עס ביז מען האלט זיך פאר א קדוש עליון, אין ווער ס'גלייבט נישט איז ממש א אפיקורוס,

אין דא מיז מען צילייגען א וויכטיגע פוינט, ווען אייננער האט אסאך מענטשען וואס זענען פארגלייבט אין אים אוטומאטיש באקומט עפעס א רחניות'דיגע כוח, דאס האט גארנישט מיט יודישקייט נאר אזוי ארבעט די טבע, דאס איז די וועג וויזוי א קולט ארבעט אז די לידער פין די קולט ארבעט מיט זיינע טאקטיקען אז זיינע קרבנות זאלען זיין פארגלייבט אין אים, אין אזוי באקומט ער ענערזשי פין זיי, (ס'איז ביי גוים אויך אזוי, אין ס'דא גוים וואס באקומען כוחות פין דעם למשל ביי די אראבער איז עס מער איינגעפירט איןסאך שטערקער ווי ביי די אידן) אין ווען ס'איז אסאך מענטשען איז עס א שטארקע כוח,

יעצט סתם א רבי ווייס דאך נישט פין דעם סוד, אין ווען ער זעהט אז ער האט עפעס א כוח רעדט ער זיך איין אז ער איז טאקע עפעס אין איין מאל עפעס א מופת געלונגט אדער אפילו מען קען זיך נאר איינרעדען אז ס'געלונגען, ווערען די חסידים דאפעלט פארגלייבט אין אזוי גייט עס ווייטער אין ווייטער,

יעצט לויט ווי עס קוקט מיר אויס איז אין סקווער די מעשה, אז סובקונטשעסלי אדער אפשער אפילו קאנטשעסלי ווייסט סקווערע רבי אז אלעס וואס ער האט קומט פין די מענטשען וואס גלייבען אין אים אין פארדעם טוט ער אלעמאל שטיצען די עקסטרעמיסטען, אין ער ווייזט זיי אז ער איז ציפרידען פין די אלע פראפעגאנדע וואס זיי ריפען אמונת צדיקים, אין פארדעם גייט עס ווייטער אין ווייטער, אין די ליבעראלע ווערען דארווייטערט אלץ קאלטע חסידים,

אין ווי מער מאכטפול ער ווערט אלץ מער עדיקטעד ווערט ער דערצי, אין אלץ מער האט ער א נגיעה אז ס'זאל ווייטער אנגיין אין ווערען מער (פארשטייט זיך אז ס'קען זיין אז ער רעדט זיך איין אז ס'איז לשם שמים) אין קיינער קען אים גארנישט זאגען, ווייל אזוי ארבעט עס ביי א דיקטאטאר, זיינע ארומיגע זאגען אים נאר וואס ער וויל הערען, אין ער ווייסט נישט אין וויל נישט וויסען די אמת, ווען איינער זאגט אים א זאך וואס ער וויל נישט ס'זאל זיין אמת (געהערט פין מקור ראשון) הייבט ער אן צי האקען אין טיש אז ס'נישט אמת, אין ס'ווערט אויס אמת,

מען דארף פארשטיין אז מען רעדט דא פין א מענטש וואס איז נאך קיינמאל נישט ארויס פין זיינע ד' אמות, חוץ ווען ער איז געווען אין וויזשניץ פאר בערך צוויי חדשים נאך זיין חתונה, האט ער נאך קיינמאל נישט עקספיריענסט די עכטע וועלט, ער האט נאך קיינמאל נישט געלעבט צווישען עכטע מענטשען, ער ווייסט ניט אמאל וואס דאס מיינט, ווי ער פארט פארט זיינע ד' אמות מיט, אין ממילא ער לעבט אין א וועלט וואס איז נישט ריאליטי, אין טאמער הייבט איינער אן צי רעדעען פין ריאליטי רעגט ער זיך אויף,

יעצט ווען די גאנצע הנהגה וואלט נישט געשאדט פאר קיינעם, דאן חאטשיג ס'איז א פארדרייטע דרך אבער מיילא, אבער די מציאות איז אז ס'שאדט זייער שטארק, די גלייבן סיסטעם פין סקווער איז זייער דעסטראקטיוו, אין מענשען קענען נישט געהעריג אזוי לעבען, אין פארדעם איז זייער א גרויסע חלק פין שטעטל נישט ציפרידען פין דעם אין זיי עסען זיך פין אינווייניג,

 א חלק דערוואגען זיך צי טראכטען אז די גאנצע זאך איז שקר, אבער א גרעסערע חלק קען נישט אזוי טראכטען ווייל ס'שווער אויסצירייסען א חינוך פין יארען, אין ממילא גייען זיי אין א ראהליקאסטער פין קאנפליקטיגע מחשבות, איין טאג האבען זיי "נסיונות אין אמונת צדיקים" אין די צווייטע טאג זענען זיי זיך מחזק אין אמונת צדיקים, וועגען דעם זענען א סאך ביזי אסאך צי פאר ציילען מופתים פין  רבי ווייל מיט דעם קענען זיי צייטווייליג דערשטיקען די שווערע געפילען וואס זיי האבען אין הארץ,

ס'נישטא נאך א פלאץ אויף דער וועלט וואס פרובירט צי קאנטראלירען אזוי שטארק זייער איינוואוינער, זיי טארען נישט שיקען זייערע קינדער נאר אין זייערע מוסדות, אפילו אין ישיבה קטנה אין ישיבה גדולה איז עס נישט ערלויבט, נאר אמאל אז ס'וויכטיג קען מען אמאל פועל'ן מיט גרויס פראטעקציע, אין פארוואזשע זאל מען דען שיקען? איינער זאגט מיר א סקווערע רבי האט "אליינס געזאגט" אז פין ארץ ישראל ווייסט ער נישט אבער אין אמעריקע איז זיין ישיבה די בעסטע ישיבה,

 אין אז מען רעדט שוין פין וואס ער האט אליינס געזאגט, האט מיר איינער א באגלייבטער מענטש געזאגט אמאל, אז סקווערער רבי האט געזאגט  אז וויפעל א ילוד אשה קען זיך אויסארבעטען די מדות האט ער זיך שוין אויסגעארבעט,

עכ"פ נאך א מנהג האט ער אז ווען ער קומט ארויס צווישען עולם ביי א טיש אד"ג ציהט ער ארויף א ברוגז פנים, דאס טוט ער כדי ס'זאל הערשען א שרעק, פין צייט צי צייט שיסט ער שארפע בליקען אויף דעם אין יענעם, אין די חסידים ציטערען אין טראכטען וואס האט ער שוין געזעהן אויף זיי אז ער קוקט זיי אהן אזוי שטרענג, כ'דענק נישט נאך א פלאץ ווי מען זעהט אז די חסידים שטייען ביים טיש אזוי ווי דערשראקענע שעפסען מיט ארויסגשטארצטע אויגען, ווען כ'האב עס געזעהן האב איך עס נישט סובל געווען, כ'האב נישט פארשטאנען וואס ער וויל פין זיי, פארוואס דערשרעקט ער זיי, וואס האבען זיי אים געטוהן אז ער זאל אזוי טרעטען אויף זיי,

נאכדעם קומט די שטיוועל סומאטוכע, ביי זיין טאטען איז דער עולם נישט געגאנגען מיט קיין שטיוועל אבער ער האט איינגעפירט אז יעדער זאל אנטוהן שטיוועל אין ער שטעלט זיך דערויף אין צווינגט וועם ער קען, איינער וואס האט נישט ליב געהאט די שטיוועל אין עס אויסגעטוהן פרעגט ער אים וואס ס'גייט פאר מיט די שטיוועל האט יענער עפעס גענפערט אז די פיס ס'שווער, האט ער זיך אנגעריפען נע ס'נישט די פיס ס'איז די קאפ, עכ"פ יענער האט געמיזט צירוק אנטוהן,

יעצט ס'דא אזא זאך ווי א חסידישע לבוש אבער ווען איינער ערפינדעט א נייע לבוש אין נאך דערצי א לבוש וואס ס'איז שווער צי גיין דערמיט, ווי האט ער א רעכט צי צווינגען יענעם צי גיין דערמיט, אין מאכען יענעם פילען גילטי, ס'געווען אמאל א שידוך וואס זיין זוהן איז געווען שדכן, פאר א בחור וואס זיין טאטע גייט מיט א קורצע רעקעל, אין נאך די שידוך איז געווארען האט ער געלייגט פרעשור אז דער בחור זאל אנטוהן שטיוועל, יענעם'ס מאמע האט פארשטייט זיך נישט געוואלט (יענעם'ס מאמע האט בכלל נישט געוואלט שיקען אויף סקווער נאר נאך פרעשור פין אים האט זי אהין געשיקט) האט ער געזאגט אז אזוי ווי זיי האבען א איידעם וואס גייט מיט ווייסע זאקען, איז שטיוועל אויך גוט,(כאילו ס'איז די זעלבע זאך), עכ"פ דער בחור האט צים סוף אנגעטוהן,

עכ"פ צירוק צים ענין אז די גרעסטע פראבלעם איז אז זיין הנהגה ציברעכט זיינע מענטשען, אין זיי זענען נישט גענוג שטארק צי רעוואלטירען, ער האט מצליח געווען רוב פין זיי צי פארוואנדלען אין א סטאדע פין דערשראקענע שעפסאלעך, אין זיי עסען זיך פין אינווייניג אנשטאט צי רעוואלטירען, נאך אלעם נאך אזא חינוך אין אזא רוח וואס ער מאכט גלייבען, זיי אין אים אין זיי ציטערען פין זיין הקפדה, אין אזוי גייט אריבער א יאר נאך א יאר אין ס'נישטא ווער ס'זאל אויפקלערען פאר סקווערע רבי אז ער האט געמאכט דאס שטעטעל פאר א גיהנום,

ווען ער האט געהאט די שווערע צייטען פין די קארט קעיסעס, פאר א פיפצען יאר צירוק צי אביסעל ווייניגער זענען זיי געווען ביזי צי פראפעגאנדירען אז דאס אלעס קומט ווייל סקווירא איז אזוי הייליג אין די סיטרא אחרא וויל עס אינטער ברענגען, ווען סקווירא רבי זאל פארשטיין אז דער באשעפער האט אים געגעבען א ווינק אז ער זאל זיך חאפען אין וואס פאר א שקר ער לעבט וואלט אפשער בעסער געווען, אנשטאט האט ער געזאגט אז קיינער גייט נישט זיצען, אין שוין האבען זיי אלע נעבעך געמיזט "שטיין" אין תפיסה.

ס'נאך אסאך צי שרייבען אבער פאר יעצט וועט דאס זיין גענוג